மதுரை St.George Churchல் கன்வென்ஷனில் பிரசங்கம் செய்துவிட்டு மறுபடியும் பெரியமலை சென்றேன். அதன்பின் கன்வென்ஷனில் பிரசங்கிக்க எனக்கு வந்த எந்த அழைப்பையும் நான் ஏற்கவில்லை. சகோ.எமில் எனக்கு கொடுத்த ஆலோசனை மிகச்சரியானது. ஆகவே எனக்கு சகோ.எமில் மேல் கோபம் வரவில்லை. அதன்பின் என் முழு கவனமும் மிஷனரி பணியில் செலுத்தி மிஷனரி ஊழியத்தில் தீவிரமாக இறங்கினேன்.

அதன்பிறகு பல மாதங்கள் நாங்கள் யாரும் மலையைவிட்டு இறங்காமல் தொடர்ந்து ஊழியம் செய்தோம். அதன்பிறகு நடந்த விஷயங்களை ஏற்கனவே பல மாதங்களுக்கு முன் ஜாமக்காரனில் எழுதிவிட்டேன். அதில் என் தகப்பனார் அன்று எனக்கு எழுதிய கடிதத்தை அப்படியே ஸ்கேன் செய்து ஜாமக்காரனில் வெளியிட்டதை வாசித்திருப்பீர்கள். அவைகளை மறுபடியும் இங்கு குறிப்பிடுவது தேவையில்லை என்று நினைக்கிறேன்.

FMPB தலைமையிலிருந்து சில மாதங்கள் தொடர்ந்து எங்களுக்கு பணம் வராததாலும் மலையில் எங்கள் மிஷனரி வீட்டில் சேமித்து வைத்த அரிசி தீர்ந்துபோனதாலும் 3 நாட்கள் நாங்கள் சாப்பிடாமல் பட்டினி கிடக்க நேர்ந்தது. அதன் முழுவிவரத்தையும் ஏற்கனவே எழுதிவிட்டேன். அதன்பிறகு நானும் - ஹாரிஸ் ஹில்டன் அவர்களும் FMPB எங்களுக்கு பணம் அனுப்பாததின் காரணத்தை அறிய மிஷனரி பணிதளத்திலிருந்து மலையைவிட்டு இறங்கி FMPB அலுவலகத்துக்கு திரும்ப மலையில் காட்டு வழியே நடந்துவந்துக்கொண்டிருந்தோம். FMPB ஜெபவீரர்கள் விசுவாசிகள் FMPB ஊழியத்துக்கு தொடர்ந்து காணிக்கை அனுப்பாததால் மிஷனரிகள் பட்டினி கிடக்க நேர்ந்தது. அதனால் FMPB பொறுப்பாளர்கள் தற்காலிகமாக மிஷனரி பணி நிறுத்தி வைப்போம் என்று தீர்மானித்தனர். ஒரு மிஷனரிக்கு ஒரு வருடத்துக்குரிய காணிக்கை பணம் சேர்ந்தபின் மிஷனரி ஊழியத்தை தொடருவோம் என்று பொறுப்பாளர்கள் தீர்மானம் எடுத்ததால் எங்களை பெரிய மலையிலிருந்து அழைத்துவர டேனிஷ்பேட்டையிலிருந்து இருவர் மலைமேல் ஏறி வந்தனர். நடுமலையில் நாங்கள் அவர்களை சந்தித்து அனைவரும் டேனிஷ்பேட்டை திரும்பினோம்.

நான் மிஷனரி பணிதளத்துக்கு போகும்போது ரயில்வேயில் பணிபுரிந்துக்கொண்டிருந்த என் தகப்பனார் பணி ஓய்வு பெற்றார். எனக்கு 6 மூத்த சகோதரிகள் இருந்தார்கள். நான்தான் கடைசியாக பிறந்த ஆண் பிள்ளை. நான்கு சகோதரிகளுக்கு என் தகப்பனர் முன்நின்று திருமணம் செய்து வைத்தார். மீதி உள்ள இரண்டு மூத்த சகோதரிகளின் திருமணத்தை நடத்திவைக்கும் பொறுப்பு என்மேல் விழுந்தது. என் தகப்பனார் பென்ஷன் வேண்டாம் என்று எழுதி கொடுத்ததால் ரொக்கமாக கிடைத்த பணத்தில் ஏற்கனவே திருமணமான பெண் பிள்ளைகளுக்கு செய்யவேண்டிய செலவுகளை செய்து கையில் மீதி பணம் ஏதும் இல்லாமல்போனது. குடும்பத்தை நடத்தும் முழு பொறுப்பும் என்மேல் விழுந்தது.

நான் சம்பாதிக்கும் பணத்தில்தான் வீட்டு வாடகை முதல் அரிசி போன்ற அனைத்து செலவுகளும் நானே செய்யவேண்டியதானது. ஆகவேதான் மறுபடியும் FMPB மிஷனரி ஊழியம் தொடங்கியபோது நான் பெரியமலை செல்லவில்லை. சகோ.ஹாரிஸ் ஹில்டனுடன் வேறு சில மிஷனரிகள் பணிதளம் சென்று மிஷனரி ஊழியத்தை தொடர்ந்தனர். இன்று அங்கு ஆலயம் கட்டப்பட்டு ஏராளமான ஆத்துமாக்களுடன் சிறப்பாக சபை நடத்தப்படுகிறது. கர்த்தருக்கு ஸ்தோத்திரம். நானோ மறுபடியும் என் டாக்டர் தொழிலை தொடர்ந்தேன். டேனிஷ்பேட்டை பெத்தேல் பெல்லோஷிப் மட்டுமல்லாது சொந்தமாக 2 இடங்களில் காடையம்பட்டி - சேலம் முதல் அக்ரஹாரம் ஆகிய இடங்களில் கிளினிக் தொடங்கி பணம் சம்பாதித்தேன். கர்த்தர் என்னையும் என் தொழிலையும் நன்றாக ஆசீர்வதித்தார். என் 2 மூத்த சகோதரிகளின் திருமணத்தையும் முழு பொறுப்பொடுத்து நானே சிறப்பாக நடத்தி வைத்தேன்.