ஆகவே கடந்த 37 வருடங்களாக கன்வென்ஷனில் பிரசங்கிக்கபோகும் இடங்களில் பகல் நேரத்தில் வேதபாட (Bible Study) கூட்டத்தை நடத்தாமல், ஆலோசனை நேரம் என்ற பெயரில் மேலே குறிப்பிட்ட பல பிரச்சனைகளுக்கும், குடும்ப பிரச்சனைகளுக்கும் தனிநபர் பிரச்சனைகளுக்கும் வேதவசன அடிப்படையில் ஆலோசனைகள் கொடுக்கிறேன். அப்படிப்பட்ட அந்த ஆலோசனை நேர சந்திப்பில் பிரிந்த குடும்பங்கள் பல ஒன்று சேர்ந்துள்ளன. படிப்பில் நாட்டம் இல்லாத பிள்ளைகளுக்கு, படிக்காமல் போனால் என்ன நடக்கும் என்று அந்த பிள்ளைகளுக்கு ஆலோசனைக்கூறி அவர்களின் பிற்கால வாழ்க்கையை அவர்களுக்கு சுட்டிகாட்டி படிப்பில் அவர்களுக்கு நாட்டம் உண்டாகச்செய்ய ஆலோசனை நேரம் மிகவும் பயன்படுகிறது. அந்த ஆலோசனை நேரத்தை வெளிநாடுகளுக்கு ஊழியத்துக்கு சென்றாலும், அங்கும் நான் அதற்கு நேரம் ஒதுக்குகிறேன். அந்த குறிப்பிட்ட ஆலோசனை நேரத்தில் சபை மக்களுக்கு மனதில் உண்டாகும் வேதவசன சந்தேகங்களுக்கும், வசன ஆதாரத்துடன் பதில் அளித்து, அவர்கள் வசனத்தில் தெளிவுபெற அந்த நேரம் மிகவும் உதவியாக இருக்கிறது. இப்போதெல்லாம் எங்கு போனாலும் அந்நியபாஷை, ஜெபத்தில் கீழேவிழும் கலாச்சாரம், பரிசுத்தாவியானரைப்பற்றி தெளிவில்லாதவர்களுக்கு சரியான வசன விவரங்கள் கூறி சரியான விளக்கங்கள் அறிவிக்கின்றேன். இதைப்போன்ற விஷயங்கள்தான் அந்த நேரங்களில் மிக அதிகமாக என்னிடம் கேட்கப்படுகிறது. இதன்மூலம் அவர்களுக்கு வேதவசனத்தை வாசித்துக் காட்டி விளக்கியதால் தவறான உபதேசத்திலிருந்து தெளிவுபெற்ற பெந்தேகோஸ்தே பாஸ்டர்கள், விசுவாசிகள் ஏராளம். அந்த குறிப்பிட்ட ஆலோசனை நேரத்தில்தான் நான் ஜெபிக்க வருபவர்களின் தலையில் கைவைத்து ஜெபிக்கும் வழக்கத்தைக் கடைப்பிடிக்கிறேன். அதன்மூலம் சுகம் பெற்றவர், பிசாசு பிடியிலிருந்து விடுபட்டவர்கள் மிகவும் அதிகம். கர்த்தருக்கு மாத்திரம் மகிமை உண்டாகட்டும். இந்த ஆலோசனை நேரத்தில் என்னை சந்திப்பதற்காக வெளிஊர்களிலிருந்தெல்லாம் ஆட்கள் கூடுவார்கள். காலையில் ஆலோசனை நேரத்தில் நான் அமர்ந்தால், மதியம் சாப்பிட இயலாமல் போகும். மாலை 6 மணி வரை ஏராளமான கூட்டம் வரிசையில் காத்திருப்பார்கள். கன்வென்ஷனில் நான் பிரசங்கிப்பதில் ஏற்படும் மாற்றங்களைவிட ஆலோசனை நேரத்தில் மனம்மாறியவர்கள், மனந்திரும்பியவர்கள் ஒப்புரவானவர்கள், சுகம் பெற்றவர்களின் எண்ணிக்கை ஏராளம். ஸ்தோத்திரம்.

புறமதஸ்தரானாலும் சரி, கிறிஸ்தவர்களானலும் அல்லது மனந்திரும்பின கிறிஸ்தவர்கள் ஊழியர்கள், பாஸ்டர்களானாலும் அப்படிப்பட்டவர்களில் பெரும்பாலான குடும்பங்களில் மாமியார்-மருமகள் பிரச்சனை மிக அதிகம். இதற்கு அடிப்படை காரணங்களில் ஒன்று திருமணமானபின் மகன் பெற்ற தாயாகிய தன்மேல் இதுவரை காட்டின அன்பு குறைந்துபோய்விட்டது. புதிய மனைவியின் மேல்தான் தன் மகன் அதிகம் அன்பு காட்டுகிறான் என்ற மனோதத்துவ ரீதியான எண்ணம் ஒவ்வொரு மாமியாருக்குள்ளும் உருவாகும். அப்போது மாமியாரின் வெறுப்பு மருமகள்மேல் தானாக உருவாகும். அப்போதுதான் தனக்கு வீட்டில் மதிப்பு உண்டாக மருமகள்மேல் அதிகாரம் செலுத்த முற்படுவார். சில கூட்டுக் குடும்பங்களில் மகன் வருமானத்தில் இதுவரை உதவிபெற்ற மாமியார், நாத்தனர், மச்சினன் ஆகியவர்களின் படிப்பு, உடை தேவைகள் யாவும் திருமணமானப்பின் தன் மகனிடமிருந்து கிடைக்காமல் போகுமோ! மருமகள் வந்ததால் அந்த உதவிகள் இனி தடைப்பட்டுவிடுமோ என்ற பயம் மாமியார் உள்ளத்தில் உண்டாகும். இனி ஒவ்வொரு தேவைக்கும் மருமகளிடம் கையேந்தும் நிலை உண்டாகுமோ! என்ற பயமும் உண்டாகும். அப்போது ஏற்படும் தாழ்வு மனப்பான்மை (ஈகோ) ஆகியவைகள் சேர்ந்து மருமகள் தாங்கள் சொல்படிதான் நடக்க வேண்டும் என்று கூறி மருமகளை தங்களின் அடிமைப்போல் நடத்த ஆரம்பித்திலேயே தீர்மானம் செய்துகொள்வார்கள். சில குடும்பங்களில் மருமகளின் நகைகளை மாமியார் வாங்கிவைத்துக் கொள்வார்கள். இப்போது மருமகளின் பிடி மாமியார் கையில், மாமியார் சொல்படி நடந்தாக வேண்டிய நிலை மருமகளுக்கு ஏற்படும் கணவன் நல்ல ஆவிக்குரிய மகனாக இருந்தால் மனைவியின் நகைகளை தன் தாய் வாங்கி வைத்துக்கொள்ளவோ, தன் மனைவியின் பேரில் தன் தாய் அதிகாரம் செலுத்தவோ மகன் ஆரம்பத்திலேயே தன் தாயை கட்டுப்படுத்தவேண்டும்.