ஆயர் ஊழியம் என்பது சபை மக்களை பக்திவிருத்தியில் வளர்த்த கர்த்தரால் எழுதப்பட்ட சட்டமாகும். அது வேத புத்தகம் மூலம் சபைக்காக வகுக்கப்பட்ட முக்கியமான 5 ஊழியங்களில் ஒன்றாகும். எபேசி 4:12,13. இந்த ஆயர் ஊழியத்திற்கென தகுதிகள் உண்டு. பிரபல பிரசங்கிமார்களை ஆயர்களுக்குகூட வேதபாடம் நடத்தி, ஆலோசனை கூறும் ஊழியத்துக்கு பயன்படுத்தப்படலாம்.

  கன்வென்ஷனில் பிரசங்கிக்கும் நான்கூட தகுதியில்லாமல் ஆயராக ஊழியம் செய்யக்கூடாது. அதனால் (டாக்டர்.புஷ்பராஜ்) ஆகிய நான் ஆயர் ஊழியத்துக்கு தகுதியற்றவன். ஆயர்களைவிட நல்ல பிரசங்கம் செய்வதால் நான் ஆயர் ஊழியத்தை செய்ய இயலாது. அதற்கான முக்கிய விசேஷ தகுதிகள் உண்டு அந்த தகுதிகள் என்னிடத்தில் இல்லை. அவைகளைப்பற்றி இப்போது விளக்கமாக எழுத இயலாது.

  ஆயர்கள் என்னைப்போல கன்வென்ஷன் பிரசங்கியாராக உபயோகிக்கப்படலாம். ஆனால் பிரசங்கியாராக ஊழியம் செய்யும் நான் ஆயராக ஊழியம் செய்ய இயலாது.

  ஆனால் ஆயர் ஊழியத்திற்கென்று, வேதவசனத்தின்படி என்னை நான் தகுதிப்படுத்திக் கொண்டால் மட்டுமே ஒருவேளை நான் ஆயராகலாம். மிகவும் பயபக்தியுடன், சகலவித ஆயத்தத்துடன், சாட்சியுள்ள வாழ்க்கையுடன், விதவிதமான சுபாவமுள்ள மக்களோடு, குடும்பங்களோடு நெருங்கிப் பழகவேண்டிய ஒரு ஊழியம்தான் ஆயர் பணி.

  ஒரு ஆயர் தகப்பன் ஸ்தானத்தில் இருந்து சபை மக்களோடு நெருங்கிய தொடர்புக்கொண்டு இருந்தால்தான் சபை மக்களாகிய ஆடுகளை வழிநடத்தும் நல்ல மேய்ப்பனாக, நல்ல ஒரு ஆயராக இருக்க முடியும்.

  பழைய ஏற்பாட்டு காலங்களில் குறிப்பிட்ட இரண்டு பேர்கள்தான் (லேவி-ஆசாரியன்) இந்த பணியை செய்ய கர்த்தரால் அனுமதிக்கப்பட்டார்கள். இவர்களைத்தவிர வேறு யார் இந்த பணியை செய்தாலும் அப்போதே தேவன் அவர்களை தண்டித்துவிடுவார் அல்லது கொல்லப்படுவார்கள்.

  அதே தேவன்தான் இயேசு கிறிஸ்துவின் சிலுவை மரணத்துக்குபின், அவர் உயிர்த்தெழுந்து புதிய ஏற்பாட்டு சபையை ஆரம்பித்து வைத்து நடத்திக்கொண்டிருக்கிறார். அதே தேவன் தன் சபையில் ஆயராக ஒருவர் பொறுப்பெடுத்து சபையை நடத்த வேண்டுமானால் அதற்கான தகுதியையும் அதன் சட்ட திட்டங்களையும் வேதவசனத்தின் மூலம் எங்கள் தெய்வம் எங்களுக்கு எழுதிக்கொடுத்துள்ளார். நாங்கள் அதன்படிதான் ஆயராக பணி செய்து சபையை நடத்தவேண்டும்.

வேதவசனத்தின்படி சபை மக்களிலிருந்துதான் மூப்பர்கள் - ஆயர்கள் நியமிக்கப்படுகிறார்கள். மூப்பர்களில் இருந்துதான், ஆயர்கள், பிஷப், மாடரேட்டர் என்று இப்படி குறிப்பிட்ட பெயர்களில் சபையை நடத்த பொறுப்பு ஏற்றெடுக்கிறார்கள். இப்படிப்பட்டவர்களுக்கு குறிப்பாக, ஆயர்களுக்கு என்று எழுதப்பட்ட தகுதி என்ன? 1 தீமோ 3:2-4. கூறுகிறது.: ஒரே மனைவியை உடைய புருஷனாக (ஆணாக) இருக்கவேண்டும்......... தன் சொந்தக் குடும்பத்தை நன்றாய் நடத்துகிறவனும், தன் பிள்ளைகளைச் சகல நல்லொழுக்கமுள்ளவர்களாகக் கீழ்ப்படியப் பண்ணுகிறவனுமாயிருக்கவேண்டும்.

இந்த குறிப்பிட்ட வசனங்களிலிருந்து ஆயர் ஊழியத்துக்கு தகுதியானவன் திருமணம் செய்தவனாக இருக்கவேண்டும் என்று விளங்குகிறதல்லவா! அரவாணி திருமணம் செய்யமுடியாது!

ஒரே மனைவியை உடையவனாக இருக்கவேண்டும் - அரவாணிக்கு மனைவி கிடையாது. பிள்ளைகளை நல்லொழுக்கத்தோடு வளர்த்தினவர்களாக இருக்கவேண்டும் என்று வசனம் கூறுகிறது. - அரவாணிகளுக்கு பிள்ளைகள் உண்டாகாது. ஆகவே இந்த வேத வசன அடிப்படையில் அரவாணிகள் சபை ஆயராக ஊழியம் செய்ய தகுதியற்றவர்களாகிறார்கள் என்று கூறுகிறேன்.

  நான் ஜாமக்காரனில் அரவாணியைப்பற்றி எழுதிய விஷயம், முற்றிலும் கிறிஸ்தவர்களுக்கும், கிறிஸ்தவ சபைகளுக்கும் அறிவித்த ஆலோசனையாகும். நான் ஜாமக்காரனில் எழுதியது குறிப்பாக சபையில் ஆயர் ஊழியம் செய்வதைப்பற்றிய தகுதியைப் பற்றியதாகும்.

  இது கிறிஸ்தவ சபைக்கு வெளியே உள்ள அரவாணிகளுக்கும், அவர்களின் சங்கங்களுக்கும் இதில் சம்பந்தம் ஏதும் இல்லை என்பதை அறிவித்துக்கொள்கிறேன்.

  இஸ்லாமியர்களுக்கு தலக் என்று கூறி விவாகரத்து செய்வது அவர்கள் மதத்துக்கு உரியதாகையால் மத்திய அரசாங்கம்கூட தன் பொது சட்டத்தால் இஸ்லாமியர்களின் கொள்கையில் தலையிடமுடியவில்லை. அதுபோலதான் கிறிஸ்தவர்களுக்கும் தனி சட்டம் உண்டு. கிறிஸ்தவம் ஒரு மதம் அல்ல - அது மார்க்கம். கிறிஸ்து ஒரு மத தலைவருமல்ல. கிறிஸ்தவர்களுகென்று பரலோகத்துக்கு வழிகாட்டும் சட்டதிட்டம் அடங்கிய வேதபுத்தகம் உண்டு.

உலகில் எந்த பெயருள்ள சபைகளிலும் ஒரு கிறிஸ்தவன் அங்கமாக இருந்தாலும் அவர்கள் அனைத்து கிறிஸ்தவர்களுக்கும், அவர்கள் உலகத்தின் எந்த கலாச்சாரத்திற்குட்பட்ட கிறிஸ்தவர்களாக இருந்தாலும், எந்த நாட்டை சேர்ந்த கிறிஸ்தவர்களானாலும் அவர்கள் அனைத்து கிறிஸ்தவர்களுக்கும் ஒரே உலக சட்டம் - ஒரே வழிகாட்டி கிறிஸ்தவ வேதபுத்தகம்தான். அந்த வேதபுத்தக சட்டப்படித்தான் ஒவ்வொரு கிறிஸ்தவனும் வாழவேண்டும். ஆகவே அரவாணிகளைப்பற்றி கிறிஸ்தவ வேதபுத்தக சட்டத்தின்படி என்ன எழுதியிருக்கிறதோ அதன்படிதான் என் கருத்துக்களை எழுதினேன். அது என் கடமை! அது என் உரிமையுமாகும்! மற்றபடி அரவாணிகளை கொச்சைப்படுத்தவோ, அவமானப்படுத்தவோ நான் முயற்சிக்கவில்லை என்பதை என் உளமாற அறிவிக்கிறேன்.

  அரவாணிகளுக்கு உலகிலும், நம் இந்திய நாட்டிலும் காட்டும் பரிவு மிகவும் வரவேற்கப்பட வேண்டியதாகும். அவர்கள் சமூகத்தில் எல்லாருடன் இணைந்து வாழலாம். ஆனால் மற்றவர்களை பாதிக்காதவகையில் அவர்கள் இணைந்து வாழ எல்லா உரிமையும் உண்டு. அவர்களை அருவருப்புடன் பார்ப்பதும், அவர்கள் அருகில் வந்தால் ஒதுங்கி அவர்கள் மனதை வேதனைப்படுத்தும் விதத்தில் நடந்துக்கொள்வதும் தவறு. அதற்கும் சில காரணம் உண்டு. அவர்களில் பலர் பழகும் முறையில் காணும் சில தவறான அணுகுமுறையால்தான், அவர்களைக் காணும் எல்லாரும் அவர்களை விட்டு விலகுகிறார்கள் என்பது எல்லாரும் ஒத்துக்கொள்ளக்கூடியதாகும்.

  இந்த விஷயத்தில் ஞானமாக கிறிஸ்தவ அரவாணிகள் கிறிஸ்தவ சாட்சியை காத்துக் கொள்ளவார்களேயாகில் அவர்கள் பெண்ணாக வாழ்ந்து மற்ற பெண்களுடன் உறவாடி, கிறிஸ்தவ அன்பையும், ஐக்கியத்தையும் வளர்த்து கொள்வதில் எனக்கோ, மற்றவர்களுக்கோ எந்த ஆட்சேபனையும் இல்லை.

  தயவுசெய்து கிறிஸ்தவ அரவாணிகள் இதை புரிந்துக்கொண்டு எங்கள் எல்லாரோடும் இணைந்து வாழுங்கள். இயேசுவின் இரத்தம் எங்களை கழுவியதுபோல உங்களையும் கழுவி, மனந்திரும்புதலின் அனுபவத்தை பெற்றீர்களானால் நீங்களும், நானும் ஒருதாய் வயிற்று பிள்ளைகளைப்போல் கர்த்தரின் குடும்பமாக வாழமுடியும்.