2015 மார்ச் மாதம் இந்திய பிரதமர்.திரு.மோடி அவர்கள் இலங்கை சென்று யாழ்பாண மக்களையும் சந்தித்து ஏற்கனவே இந்தியா கட்டித்தந்த வீடுகளில் தமிழ் மக்களை குடியேற செய்து வந்ததும் இன்னும் பல ஆயிரம் வீடுகளை இந்தியா கட்டிக்கொடுக்க உடனடி ஏற்பாடுகளை செய்ததும், இந்திய ரயில்வே பணியாளர்களை அனுப்பி கொளும்பு - யாழ்பாணம் (யாழ்தேவி ரயில்) இப்போது தலைமன்னார் வரை ரயில்பாதையும், ரயில் பெட்டிகள் இஞ்சின் ஆகியவைகளை அனுப்பி ரயிலை இயக்கி திறப்புவிழா நடத்தி வந்த காட்சியை டிவியில் பார்த்தேன்.

இலங்கை உள்நாட்டு போரில் சீரழிந்த தமிழ்நாட்டு பொருளாதாரம் முன்னேற இலங்கை பண மதிப்பு சரிந்ததை சீர்ப்படுத்த பல கோடிகள் இந்தியா கொடுத்து உதவியது. இலங்கையின் பலவருட சீரழிவுக்கு இந்தியாவும் உடந்தையாக இருந்ததை உணர்ந்து பாவமன்னிப்பு கேட்டு பரிகாரம் செய்ததுபோல் மேற்கூறிய பொருளாதார உதவிகள் அமைந்தது. இலங்கையின் மறுமலர்ச்சிக்காக நாம் செய்த ஜெபம் கேட்கப்பட்டதை போல் மேற்குறிப்பிட்ட காட்சிகள் அமைந்தன. தொடர்ந்து இலங்கைக்காக ஜெபிப்போம்.

கேள்வி: கிறிஸ்தவர் ஒருவர் இறந்துபோனால் குழியில் உடலை வைக்கும்முன் உப்பு போடுகிறார்களே! எதற்காக?

பதில்: கிறிஸ்தவர் என்று எழுதியிருக்கிறீர்கள். கிறிஸ்தவர்கள் அப்படி செய்யமாட்டார்களே! எகிப்து நாட்டில் அரச குடும்பத்தில் இறப்பவர்களின் உடல் கெடாமல் இருக்க சில இரசாயன கலவைகளை போட்டு வைப்பார்கள். ஆனால் கிறிஸ்தவர்கள் அப்படி உப்பு போட்டு அடக்கம் செய்வது தவறல்லவா? ஒரு பொருள் கெடாமல் இருக்க உப்பு உபயோகிப்பார்கள். ஊருக்காய் அப்படிதான் உப்பில் ஊறப்போடுவது கெட்டுப்போகாமல் இருப்பதற்காகத்தான். நீங்கள் குறிப்பிடும் கிறிஸ்தவர்கள் உண்மையான கிறிஸ்தவர்களாக இருக்க முடியாது. இனி உங்கள் குடும்பத்தில் யாராவது இறந்தால் உப்பு கண்டிப்பாக போடவேண்டும் என்று யாராவது கட்டாயப்படுத்தினால்கூடவே கொஞ்சம் கடுகு, கருவேப்பிலை ஆகியவைகளைபோட்டு தாளிப்பதைப்போல் தாளித்து பிணத்தின் மேல்போடச் சொல்லுங்கள். இதை நான் சொன்னதாக கூறுங்கள். இதையெல்லாம் ஆயர்கள் எப்படி அனுமதிக்கிறார்கள்?. அவர்களாவது இப்படிப்பட்ட சடங்குகள் புறமதத்தினர் செய்வார்கள். நாம் அவைகளை செய்யக்கூடாது என்று ஞாயிறு பிரசங்கத்திலாவது கூற சொல்லுங்கள். இது சம்பந்தமாக பல கடிதங்கள் பல காலங்களாக எனக்கு வந்துவிட்டது. இவர்களுக்கு விளக்கம் கூறி அறிவித்து பிரயோஜனமில்லை. ஜெபியுங்கள்.

கேள்வி: நான் பல வருடமாக உங்கள் ஜாமக்காரன் பத்திரிக்கையின் வாசகன். எங்களுக்கு ஒரு ஆசை ஜாமக்காரன் பத்திரிக்கையின் அட்டையை மட்டுமாவது உயர்ந்த பாளிஷ் பேப்பர் அல்லது அட்டையில் பிரசூரித்தால் பார்ப்பதற்கு மிக அழகாக இருக்குமே? மற்ற எல்லா பத்திரிக்கைகளையும் பாருங்க, ஒரு பிரயோனமும் இல்லாத அப்படிப்பட்ட பத்திரிக்கைகளுக்கு எல்லா பக்கங்களும் பளப்பளப்பான மிக உயர்ந்த தரம்வாய்ந்த விலை அதிகமான பேப்பர் உபயோகிக்கிறார்கள். நீங்கள் மட்டும் சரி என்று ஒரு வார்த்தை கூறுங்கள். எத்தனை ஆயிரம் பிரதிகள் ஜாமக்காரன் அச்சடிக்கிறீர்களோ அதற்கான பணத்தை நாங்கள் மாதாமாதம் உங்களுக்கு அனுப்ப பொறுப்பேற்கிறோம். தயவுசெய்து சரி என்று சொல்லுங்கள்?.